बालिका करणी मुद्दामा मिलापत्र गराउन गाउँले नै लागेको पीडितको गुनासो

४ वर्षीया बालिकाको जवर्जस्ती करणी भएको मुद्दालाई गाउँमै मिलाउन पीडित परिवारलाई दवाव दिन थालिएको छ । यशोधरा गाउँपालिका–२ की ४ वर्षीया बालिकालाई स्थानीय १८ वर्षीय नासिर हुसेनले बिहीवार राति ९ बजे जवर्जस्ती करणी गरेको भन्दै उनीमाथि आरोप लगाइएको थियो। तर अहिले यस विषयलाई गाउँमै मिलाउनुपर्ने भन्दै स्थानीय अगुवाहरुले नै पीडित परिवारलाई दवाव दिन थालेका हुन् । पीडित बालिकाका बावु आरोपित हुसेनको परिवार र गाउँलेले आफूलाई डर, धम्की देखाइ घटनालाई मिलापत्रमा टुंग्याउन दवाव दिएको बताउँछन् । ‘हुसेनका बावु अब्दुल हमिद, स्थानीय हजरत अली, आफत अली लगायतले हामीलाई आर्थिक प्रलोभन समेत दिएर निकै दवाव दिएका छन्,’ पीडित बालिकाका बावुले भने । उनले आफूलाई पैसा भन्दा पनि न्याय चाहिएको बताएका छन् । गाउँलेहरुले नै ठूलो दवाव दिएपछि बालिकाका आमा–बुवा सदरमुकाम तौलिहवामा सञ्चारकर्मीहरुसँग न्यायका लागि पहल गरिदिन आग्रह गरे । बिहीवार राति छिमेकी हुसेनले चकलेट दिएर छोरीलाई खेलाउने बाहानामा जवर्जस्ती करणी गरेको पीडित परिवारको आरोप छ । घर किनारमा रहेको पुरानो भत्केको घरमा हुसेनले छोरीलाई लगेर जवर्जस्ती करणी गरेको बालिकाकी आमाले बताइन् । पीडित परिवारले जवर्जस्ती करणी गरेको भन्दै जिल्ला प्रहरी कार्यालयमा हुसेन विरुद्ध किटानी जाहेरी समेत दिएको छ । प्रहरीलाई प्राप्त जाहेरीका आधारमा बालिकाको मेडिकल चेकजाँच गरी अनुसन्धान प्रक्रिया अघि बढाइएको प्रहरी नायब उपरीक्षक देवेन्द्र पाण्डेले बताए । मेडिकल रिपोर्टमा बालिकामाथि जवर्जस्ती करणी गरिएको देखिएको छ ।यस्ता जघन्य अपराधमा दुवै पक्षको सहमति भए पनि मिलापत्र हुनै नसक्ने प्रहरी नायब उपरीक्षक पाण्डेले बताए । घटनाको थप अनुसन्धान अघि बढिसकेको र पीडकलाई हदैसम्मको कारवाही गरी पीडित परिवारले न्याय पाउनेमा विश्वस्त हुन प्रहरी नायब उपरीक्षक पाण्डेले बताएका छन्।

२०७६ साउन १२ गते ८:५८ मा प्रकाशित