शिशु हत्या गर्ने आमा पक्राउ
सप्तरीमा आफैले जन्माएको शिशु हत्या गरेको आरोपमा एक महिला पक्राउ परेकी छन् । सप्तरीको रुपनी गाउँपालिका–३ मा नवजात शिशु जन्माएर मारेर फालेको आरोपमा २५ वर्षीय महिलालाई पक्राउ गरिएको प्रहरी नायब उपरीक्षक तिलक भारतीले जानकारी दिए । हत्याको झण्डै एक महिनापछि प्रहरी अनुसन्धानबाट आमा नै दोषी देखिएपछि प्रहरीले उनलाई पक्राउ गरी कर्तव्य ज्यान मुद्दाको उजूरी दर्ता गरी थप अनुसन्धान थालिएको भारतीले बताए । महिलाको नाम प्रहरीले गोप्य राखेको छ । रूपनी गाउँपालिका–३ हर्दियास्थित तिलेश्वर साहको पोखरीमा मंसिर २८ गते माछा मार्न स्थानीयवासीले हालेको जालमा बालिका शिशुको शव फेला परेको थियो । अवैध गर्भबाट छोरी जन्मिएका कारण हत्या गरी फालिएको हुन सक्ने प्रहरीले अनुमान गरेको छ । दुई छोराकी आमा रहेकी ती महिलाको श्रीमान वैदेशिक रोजगारका लागि मलेशियामा रहेका छन्।
२०७६ माघ १ गते ८:२४ मा प्रकाशित
