होटेलमा काम लगाइदिने भन्दै किशोरीमाथि बलात्कार
होटेलमा काम लगाइदिने भन्दै एक किशोरीमाथि बलात्कार भएको छ । १५ वर्षीया किशोरीलाई बलात्कार गरेको आरोपमा सल्यानको शारदा नगरपालिका– १ श्रीनगरनिवासी ४५ वर्षीय हिमराज बुढाथोकीलाई प्रहरीले पक्राउ गरेको छ ।
आर्थिक अवस्था कमजोर भएकी ती बालिकाका बुबासँग साउन २३ गते छोरीलाई श्रीनगरमा सञ्चालनमा रहेको रोयल गेस्टहाउसमा काम लगाइदिन्छु भनी घरबाटै लिएर आएको र होटेलमा नलगी चल्ला फर्ममा जाम भन्दै भगवतीखोलाको जंगलमा लगी बलात्कार गरेको पीडित बालिकाले बताइन् ।
मासिक तीन हजार रुपैयाँमा होटेलमा सरसफाइको कामका लागि मानसिक सन्तुलन सुस्त रहेका बुबासँग स्वीकृति लिए पनि आफूले जान नमानेपछि जबर्जस्ती घरबाट लगेको बालिकाको आरोप छ ।
पीडितको बुबा सुस्त श्रवण भएका कारण इन्सेकको रोहवरमा पीडित पक्षले जिल्ला प्रहरी कार्यालयमा मुद्दा दर्ता गराएका छन् । जिल्ला अस्पताल सल्यानमा पीडित बालिकाको स्वास्थ्य परीक्षण साउन २४ गते भएको अस्पतालका निमित्त प्रमुख भीमकान्त जैसीले बताए । आरोपितलाई हिरासतमा राखी घटनाबारे थप अनुसन्धान भइरहेको जिल्ला प्रहरी प्रमुख डिएसपी ढकेन्द्र खतिवडाले जानकारी दिए ।
