चुनावी सुरक्षामा खटिएका म्यादी प्रहरीले किशोरीमाथि बलात्कार गरेको आरोप

चुनावी सुरक्षाका खटिएका म्यादी प्रहरीले एक किशोरीमाथि सामूहिक बलात्कार गरेको घटना सार्वजनिक भएको छ । बाँकेको नरैनापुर गाउँपालिका–५ मटेहियामा खटिएका पुरुष म्यादी प्रहरीले १४ वर्षीया किशोरीमाथि सामूहिक बलात्कार गरेको घटना सार्वजनिक भएको । इलाका प्रहरी कार्यालय भोज भगवानपुरट गस्तीमा खटिएका ३ जना म्यादी प्रहरीले गाउँकै किशोरीमाथि सामूहिक बलात्कार गरेको स्थानीयले बताएका छन् । इलाका प्रहरी कार्यालयभन्दा तीन किलोमिटर गाउँमा उक्त घटना भएको जनाइएको छ ।चुनाव सकिएपछि गत सोमवार गस्तीका लागि म्यादी प्रहरी परिचालन गरिएको थियो । गस्तीमा खटिएका म्यादी प्रहरी जवानले किशोरीलाई घर नजिककै झाडीमा लगेर जबरजस्ती गर्न खोजेको गाउँलेले बताएका छन् । झाडीमा किशोरी गाउँलेहरु त्यहाँ पुगेका थिए । गाउँलेले म्यादी प्रहरी टेकबहादुर बिकलाई नियन्त्रणमा लिएर प्रहरीको जिम्मा लगाएका छन् । घटनामा संलग्न भएिका अन्य दुई जना म्यादी प्रहरी भने फरार भएको बताइएको छ । सोमवार साँझको घटनालाई स्थानीयस्तर मै मिलाउने प्रयास गरिएपनि विवाद बढ्दा जिल्ला प्रहरी कार्यालयसम्म पुगेको छ । घटनामा संलग्न भनिएकामाथि अनुसन्धान थालिएको जिल्ला प्रहरी कार्यालय बाँकेले जनाएको छ । 

२०७४ पुस ४ गते प्रकाशित