बालबालिका अधिकारसम्बन्धि विधेयक पारित
प्रदेश नं १ को बालबालिकाको अधिकार सम्बन्धमा व्यवस्था गर्न बनेको विधेयक, २०७६’ माथि विचार गरियोस् भनि प्रस्ताव सर्वसम्मतिबाट पारित भएको छ। प्रदेशसभाको आज बसेको बैठकमा प्रदेशसभा नियमावली, २०७४ को नियम ९३ बमोजिम सामजिक विकास राज्यमन्त्री जसमाया गजमेरले सो प्रस्ताव सदनमा पेश गरेका थिए। विधेकयको सैद्धान्तिक छलफलमा प्रदेशसभा सदस्य कुलप्रसाद साम्बाले विधेयकले बालगृह तथा बालआश्रमको विषयमा पनि बोल्नुपर्ने भन्दै विद्यालय तहमा पोषण कार्यक्रम सञ्चालन गर्न विधेयकमा व्यवस्था हुनुपर्ने माग गरे। सदस्य जयराम यादवले विधेयक अत्यन्त राम्रो रहेको र यसबाट बालबालिका लाभान्वित हुने चर्चा गरे। अर्का सदस्य शान्ता पौडेलले तीन वर्ष मुनिका बालबालिकालाई पौष्टिक आहारको व्यवस्था विधेकयमा भएमा लक्षित वर्ग लाभान्वित हुने चर्चा गरिन्।यसअघि बैठकको शून्य समयमा सांसदहरुले नोबेल कोरोना भाइरसबाट आम नागरिकलाई सुरक्षित राख्न प्रदेश सरकारले पूर्वतयारी गर्न तथा विभिन्न सडकहरुको स्तरोन्नतिका लागि सरकारको ध्यानाकर्षण गराएका थिए। प्रदेशसभाको अर्को बैठक यही फागुन २२ गते दिउँसो १ बजे बस्नेछ।
२०७६ फागुन १८ गते ३:१५ मा प्रकाशित
