१ किलो गाँजासहित बालक पक्राउ
विराटनगर महानगरपालिका–४ बरगाछीबाट लागुऔषध गाँजासहित सोमबार दिउँसो एक बालक पक्राउ परेका छन् । धनकुटाको शहीदभूमि गाउँपालिकास्थित खोकु घर भएका १५ वर्षीय विमान राई पक्राउ परेको मोरङ प्रहरी प्रमुख एसपी मनोजकुमार केसीले बताए। राईका साथबाट १ किलो गाँजा बरामद भएको जानकारी उनले दिए । प्रहरीका अनुसार एउटा मोटरसाइकलको पछाडि बसेर धरानबाट विराटनगर आएका उनी बरगाछीमा ओर्लिएका थिए। मोटरसाइकलबाट ओर्लिएर शंकास्पद रुपमा हिंडिरहेको अवस्थामा प्रहरीले नियन्त्रणमा लिएर बोकेको झोला र उनको शरीर खानतलासी गरेको थियो । त्यस क्रममा राईले बोकेको झोलाभित्र १ किलो गाँजा बरामद भएको एसपी केसीको भनाइ छ । उनी चढेर आएको मोटरसाइकलको पनि खोजी सुरु गरिएको प्रहरीको भनाइ छ। राई पक्राउ परेसँगै धनकुटामा अवैध रुपमा उत्पादन गरिने गाँजा ओसारपसारमा बालबालिकाको प्रयोग गर्न थालिएको प्रहरीको भनाइ छ । प्रहरीले वास्ता नगर्ने भएकाले पनि बालबालिका प्रयोग गरेर गाँजा ओसारपसार गर्दै गन्तव्यसम्म पुर्याउन थालिएको मोरङ प्रहरीका प्रवक्ता डीएसपी घनश्याम श्रेष्ठले बताए । उनले बालकबाट बरामद भएको गाँजा कहाँ लगिएको थियो भन्ने बारेमा अनुसन्धान सुरु गरिएको बताए । बालकमाथि सुरु गरिएको अनुसन्धानले गाँजाको ओसारपसार र कारोवारका बारेमा केही नयाँ कुराहरु खुल्दै गएको छ,’ डीएसपी श्रेष्ठले भने, उनीसँग ‘कनेक्सन’ देखिएकाहरुलाई पनि अनुसन्धानको दायरामा ल्याएर कारवाही अघि बढाइने छ।
२०७६ बैशाख ३० गते ६:३९ मा प्रकाशित
