माटोको ढिस्कोले पुरिएर डोटीमा एकको मृत्यु, एक घाइते

डोटीको दिपायल सिलगढी नगरपालिका – ३ दिपायलको कठायत टोलमा माटोको ढिस्कोले पुरिएर एक बालिकाको ज्यान गएको छ भने एकजना गम्भिर घाइते भएका छन् । इलाका प्रहरी कार्यालय दिपायलका प्रमुख दिलबहादुर कुँवरका अनुसार माटोको ढिस्कोमा पुरिएर ज्यान जानेमा डोटीको शिखर नगरपालिका –११ बस्ने ३ वर्षीया यसोर्या बलायर रहेकी छिन् । केही दिन पहिले यो टोलमा जेसीबीले सडक खनेको थियो । सडक खनेको ठाउँमा खेल्दै गर्दा एका एक माथी बाट पहिरो आउँदा निज बालिका पहिरोमा पुरिएको बताइएको छ । त्यस्तै पहिरोमा परि स्थानीय ५६ वर्षीय तेजबहादुर साहु गम्भिर घाइते भएको दिपायल प्रहरीले जनाएको छ । गम्भिर घाइते हुनुभएका साहुको दिपायल पिपल्लामा रहेको शैलेस्वरी अस्पतालमा उपचार भइरहेको छ ।

२०७४ चैत्र ७ गते १२:१८ मा प्रकाशित