पौडी खेल्ने क्रममा डुबेर मृत्यु
आँधीखोलामा पौडी खेल्ने क्रममा डुबेर एक बालकको ज्यान गएको छ ।स्याङ्जाको गल्याङ नगरपालिका-३ तल्लो गल्याङस्थित आँधीखोलामा डुबेर गल्याङ-७ लोइडाँडाका अन्दाजी १२ वर्षीय सन्दिप रानाको मृत्यु भएको हो । बुधबार दिउँसो २ बजेतिर पौडी खेल्ने क्रममा वेपत्ता भएका रानालाई स्थानीयको सक्रियतामा खोजी पौडी खेलेकै ठाउँबाट ३ बजे निकालिएको थियो । निकालेर सामुदायिक अस्पताल गल्याङ लगेपछि उनलाई मृत घोषणा गरिएको हो । मृतक राना चिराग आवासीय मावि गल्याङका कक्षा ६ का विद्यार्थी हुन् । तल्लो गल्याङमा सञ्चालित भलिबल प्रतियोगिता हेर्न गएका राना खेलस्थान नजिकै पौडी खेल्ने क्रममा डुबेर मृत्यु भएको स्थानीयले जनाएका छन् । मृतक रानाको शव सामुदायिक अस्पतालमा राखिएको छ । घटनाको विषयमा जानकारी लिन प्रहरी अस्पतालमा पुगेको छ ।
२०७४ चैत्र २८ गते ५:१६ मा प्रकाशित
