जोखिमपूर्ण अवस्थामा राखिएका ९ बालबालिकाको उद्धार
मिति २०७६ साल भदौ ४ गते राष्ट्रिय बाल अधिकार परिषद्को नेतृत्वमा महानगरीय प्रहरी वृत्त, स्वयम्भु, बालबालिका खोजतलास समन्वय केन्द्र १०४, नागार्जुन नगरपालिका४ नं. वडा कार्यालय, बाल हेल्पलाइन १०९८ तथा स्थानीय प्रतिनिधिहरुको समन्वय र सहकार्यमा काठमाडौं जिल्ला नागार्जुन नगरपालिका वडा नं. ४ सितापाईला, ख्वपाटोल स्थित एक घरमा“नमुना प्रगतीशिल महिला समाज रयुवा सामुदायिक सेवा केन्द्र”द्धारा अत्यन्तै जोखिमपूर्ण अवस्थामा राखिएका ४ बालक र ५ बालिका गरी जम्मा ९ जना बालबालिका उद्धार गरिएको छ । ५ देखि ११ बर्ष उमेर समूहका ती बालबालिका बर्दियाका ४ जना कालिकोटका ४ जना र कैलालीका १ जना रहेका छन् । उक्त संस्थाले आवासीय बालगृहको सञ्चालन तथा व्यवस्थापन सम्बन्धी मापदण्ड २०६९ मा भएको व्यवस्था विपरीत उचित खानपान, आवास तथा शिक्षा र संरक्षणको प्रबन्ध नभएको पाइएकोले बालबालिकाको उद्धार गरिएको हो । हाल बालबालिकालाई अल्पकालिन संरक्षणको व्यवस्था गरिएको छ । उक्त संस्थाको सञ्चालक तथा संलग्न व्यक्तिहरुलाई आवश्यक अनुसन्धानका लागि प्रहरीले नियन्त्रणमा लिएको छ।
